საქართველოს წიგნის გამომცემელთა და გამავრცელებელთა ასოციაცია

მიმდინარე პროექტები

თბილისის წიგნის საახალწლო ფესტივალი

თბილისის წიგნის საახალწლო ფესტივალი, საქართველოს წიგნის გამომცემელთა და გამავრცელებელთა ასოციაციის ორგანიზებით უკვე მეექვსედ, 2019 წლის 27 დეკემბრიდან 29 დეკემბრის ჩათვლით, საქართველოს პარლამენტის ეროვნული ბიბლიოთეკის საგამოფენო დარბაზში გაიმართა.

ასოციაციის ინიციატივით საქართველოში ტრადიციად დამკვიდრდა დეკემბრის ბოლოს წიგნის საახალწლო ფესტივალის ჩატარება. ფესტივალი მიზნად ისახავს საქართველოში წიგნის კითხვის პოპულარიზაციისა და ლიტერატურული პროცესების ხელშეწყობას, საქართველოში წიგნიერებისა და განათლების ხელმისაწვდომობის გაზრდას და საახალწლოდ, ოჯახის წევრებისთვის, მეგობრებისა და ძვირფასი ადამიანებისთვის წიგნის ჩუქების ტრადიციის დამკვიდრებას. 

თბილისის წიგნის საახალწლო ფესტივალის ჩატარების აუცილებლობა საზოგადოების მაღალმა ინტერესმა განაპირობა. 2014 წლის თბილისის წიგნის საერთაშორისო ფესტივალის ვიზიტორთა რაოდენობამ ნათლად აჩვენა , რომ საჭირო იყო კიდევ ერთი ფესტივალის ჩატარება, სწორედ ამიტომ ასოციაციის ორგანიზებით, 2014 წლის 25-28 დეკემბერს წიგნის საახალწლო ფესტივალი პირველად ჩატარდა.

ფესტივალის ძირითადი ნაწილი წიგნის ბაზრობაა, სადაც მონაწილე გამომცემელ და გამავრცელებელ ორგანიზაციათა მთავარი საზრუნავი სტუმრებისათვის წიგნებისა და წიგნთან დაკავშირებული ატრიბუტიკის განსაკუთრებული სადღესასწაულო ფასდაკლებითა და სპეციალური სასაჩუქრე პაკეტების საშუალებით შეთავაზებაა.

სამ დღიანი მასშტაბური პროგრამის ფარგლებში წიგნის საახალწლო ფესტივალი თავს უყრის წიგნთან, ლიტერატურასთან და სამწერლო/საგამომცემლო საქმიანობასთან დაკავშირებულ ფაქტობრივად ყველა სახის აქტივობას; დაწყებული გამომცემელთა მიერ ახალი წიგნებისა და ავტორების წარდგინებებით და მკითხველების მწერლებთან შეხვედრა/დისკუსიებით, დამთავრებული ლიტერატურული დაჯილდოვებებით, პროფესიული სემინარებითა და კონფერენციებით. ფესტივალზე ყოველწლიურად ეწყობა საბავშვო კუთხე და იგეგმება გასართობი პროგრამა ბავშვებისათვის.

2019 წლის წიგნის საახალწლო 3-დღიანი ფესტივალი ტრადიციულად პარლამენტის ეროვნულ ბიბლიოთეკაში უკვე მეექვსედ ჩატარდა. ღონისძიების ორგანიზატორი წიგნის გამომცემელთა და გამავრცელებელთა ასოციაცია გახლდათ. ღონისძიების ოფიციალური პარტნიორები იყვნენ პარლამენტის ეროვნული ბიბლიოთეკა, თბილისის მერია და თიბისი.

 

 

 

ფოტო გალერეა
ვიდეო გალერეა
მსგავსი სიახლეები
პარტნიორები